Enillwyr Gwobrau Bionet 2023

Nod y gwobrau Bionet yw ddathlu gwaith pobl leol, cymunedau, sefydliadau a busnesau yng Ngogledd Ddwyrain Cymru i gadw, gwarchod a gwella bioamrywiaeth.

Mae Bionet yn credu ei bod yn bwysig dathlu’r llwyddiannau a gyflawnwyd dros fioamrywiaeth. Yng ngoleuni’r argyfwng ecolegol, mae llawer o’r newyddion rydym yn ei glywed yn negyddol, ond mae llawer o bobl yn cael effaith bositif drwy gamau gweithredu lleol.

Rhennir y gwobrau yn 8 categori i ddangos sut y gall camau gweithredu gwahanol gael effaith bositif ar fioamrywiaeth mewn llawer o wahanol sectorau.

Hoffwn llongyfarch y enillwyr canlynol:

O ran ein Gwobr Grŵp Cymunedol, cawsom geisiadau ardderchog eleni. Cyflwynwyd Gwobr Grŵp Cymunedol i Grŵp Chirk Swifts & House Martins!

Mae’r grŵp hwn, a arweinir gan Hayley Garrod, wedi bod yn gwneud gwaith anhygoel i amddiffyn gwenoliaid duon a gwenoliaid y bondo yng ngogledd-ddwyrain Cymru. Ers dechrau’r grŵp yn 2021, mae’r aelodau wedi creu 130 o leoedd i wenoliaid duon a gwenoliaid y bondo nythu, drwy osod blychau a chwpanau nythu ledled y Waun. Maent hefyd yn ymwneud â’r gwaith o archwilio’r ardal leol am nythod – gan gynnwys y nythfa yn Nhraphont Ddŵr y Waun – yn ogystal ag achub, adsefydlu a rhyddhau cywion sy’n neidio o’r nyth yn rhy gynnar. Yn ogystal â’r gweithgareddau hyn, maent wedi bod yn bresennol mewn nifer o ddigwyddiadau ac wedi dechrau grŵp Facebook, sydd bellach â 500 o aelodau, er mwyn codi ymwybyddiaeth i ymdrechion adar. Dyma enghraifft wych o’r effaith gadarnhaol y gall pobl ei chael ar fioamrywiaeth yn eu hardal leol.

Llongyfarchiadau i bawb sy’n ymwneud â grŵp Chirk Swifts & House Martins ar eich gwobr. Ni allwn aros i gael clywed am yr holl waith sydd wedi ei drefnu ar gyfer y dyfodol.

Disgyblion a staff Ysgol Uwchradd Prestatyn yw enillwyr ein Gwobr Ysgol Uwchradd eleni!

Mae’r ysgol hon yn llawn haeddu’r wobr oherwydd ei hymroddiad i natur drwy blannu gwrych dwbl ar gae’r ysgol gyda channoedd o goed ifanc yn ogystal â choed ffrwythau. Mae’r ysgol hefyd wedi creu nifer o byllau bychain, gwrych marw ar gyfer pryfed, ac wedi cynnal ardaloedd lle nad yw’r glaswellt yn cael ei dorri; rhoddir hadau blodau gwylltion a thywyrch ar y tir hwn er mwyn hybu twf blodau gwylltion. Mae’r ysgol wedi buddsoddi mewn cychod gwenyn, gwestai trychfilod a blychau adar i ddenu bywyd gwyllt a darparu cynefin ar eu cyfer.
Da iawn i’r disgyblion a’r staff ardderchog am yr holl waith a wnaed. Rydym yn edrych ymlaen at weld eich safle’n ffynnu.

Roeddem eisiau tynnu sylw at y gwaith rhagorol sydd wedi cael ei gyflawni gan ein Cynghorau Tref a Chymuned lleol, a sut maent wedi gwella mannau lleol er mwyn i bawb allu eu mwynhau. Rydym yn falch iawn o gyflwyno Gwobr Cyngor Tref neu Gymuned Bionet i Gyngor Cymuned Gwersyllt.

Bu Cyngor Cymuned Gwersyllt, ar y cyd â Chyngor Sir Wrecsam, yn plannu dros 2,000 o goed llydanddail cynhenid i greu coetir cymunedol. Mae Cyngor Cymuned Gwersyllt hefyd yn gweithio gyda sefydliadau’r trydydd sector i gyflawni cyfres o welliannau isadeiledd gwyrdd o berllannau ffrwythau a dolydd blodau gwylltion i greu amgylchedd bioamrywiol, bywiog, ar gyfer pobl a bywyd gwyllt.

Llongyfarchiadau i bawb a oedd yn rhan o’r gwaith rhagorol a gyflawnwyd gan Gyngor Cymuned Gwersyllt!